مہمان نوازی پاکستان والوں کی فطرت ہے اور پھر اگر مہمان دلپسند ہو تو اس کی آمد کی خوشی میں اور بھی اضافہ ہو جاتا ہے ۔ سردی بھی ہم سب کے لۓ ایک ایسا ہی مہمان ہے ۔ شاذ و نادر ہی کوئی ہو گا جس کو سردی پسند نہ ہو گی ۔ سردی کی ہوائیں چلتے ہی یہ دل گھر کی چار دیواری سے باہر نکلنے کے لئے مچلنے لگتا ہے ہلکی پھلکی سردی میں آوٹنگ کے پروگرام ترتیب دئے جاتے ہیں ۔ اور جب ہوا کی ٹھنڈک محسوس ہوتی ہے تو بہت تازگی کا احساس ہوتا ہے۔
گلیوں کوچوں میں سے سردی کی سوغاتوں کی صدائیں آنا شروع ہو جاتی ہیں۔ سب سے دلپسند صدا مونگ پھلی کی ہوتی ہے ۔ گرم گرم بھنی ہوئی مونگ پھلی جو کہ عام طور پر شام کے اس پہر ملتی ہے جب ابوگھر پر ہوتے ہیں اور بھائی کو پیسے دے کر کہتے ہیں جاؤ مونگ پھلی والا آیا ہے ٹھیک سے بھنوا کر لانا اور دیکھنا جلی ہوئی نہ دے۔
مکئی کے دانے
ایک اور خاص سوغات ریڑھیوں پر بھونے جانے والے مکئی کے دانے ہوتے ہیں ۔ سردی میں بار بار لگنے والی بھوک کو آسرا دینے کا یہ ایک بہتریں ذریعہ ہے ۔ پشاور کے رہنے والوں کو تو وگی غورے (بھٹہ کھاؤ گے) کی صدائیں اپنی طرف کھینچ لیتی ہیں ۔
گڑ اور چینی کی بنی ریوڑیاں
چکوال کی گڑ اور چینی کی بنی ریوڑیاں خالی چکوال کے لئے نہیں بلکہ پورے پاکستاں کی دلپسند ہیں ۔ جن پر لگے تل اور خاص لذت انہیں سردیوں کی پسندیدہ ترین سوغات قرار دیتے ہیں۔
مصالحے والا گڑ
مصالحہ والا گڑ خاص طور پر مردان کی سوغات ہے اور اس کو مصالحہ والا اس لئے نہیں کہا جاتا کہ اس میں نمک مرچ ہوتی ہے بلکہ مصالحے کے نام پر اس گڑ میں پکنے کے دوران مختلف اقسام کا ڈرائی فروٹ ڈالا جاتا ہے جو اس کی لذت میں کئی گنا اضافہ کر دیتا ہے۔
گاجر کا حلوہ
سردی کی بات کریں اور گاجر کے حلوے کا ذکر نہ ہو تو لگتا ہے بات ادھوری ہے ۔ اللہ تعالی نے پاکستان کو الحمدللہ ہر قسم کی نعمت سے نوازہ ہے گاجر بھی ان میں سے ایک ہے جو وافر مقدار میں ملک کے ہر حصے میں پائی جاتی ہے اور سردیوں میں لوگ دوسرے پکوانوں کے ساتھ ساتھ حلوہ بھی بناتے ہیں جس کی لذت کے لئے اتنا کہنا کافی ہے کہ لگتا ہے سیدھا جنت سے آیا ہے۔
یہ سب اور ایسی بہت سی سوغاتیں سردی کے ساتھ ہمارے گھروں میں آجاتی ہیں ۔ ان کی خوبصورتی کا سب سے اہم پہلو یہ ہوتا ہے کہ ان کے یا سردی کے بہانے گھر والے ایک کمبل میں بیٹھ کر ایک ساتھ وقت کزار سکتے ہیں۔
کیا آپ سردی اور سردی کی سوغاتوں کا استقبال کرنے کےلیئے تیار ہیں؟
نیشنل فنانشل لٹریسی پروگرام فار یوتھ کی جانب سے ای- لرننگ پورٹل کا آغاز