ایشیا کو دنیا بھر میں اسرار کی سرزمیں کہا جاتا ہے۔ جتنا یہاں کے بارے میں جاننے کی کوشش کی جاتی ہے اتنی ہی محیر العقول داستانیں اور اوھام سننے کو ملتے جاتے ہیں۔
ہمارا پیارا ملک پاکستان بھی ایشیا کے جنوب میں واقع ہے اور ان تمام داستانوں اور اوھام کا امین ہے جو ایشیا سے منسلک ہیں یہاں کے لوگ سینہ بہ سینہ چلنے والے ان اوھام کو نہ صرف مانتے ہیں بلکہ اپنے روز مرہ کے معاملات میں ان داستانوں اور ان سے جڑے اوھام کا خیال رکھتے ہیں ۔
جو لوگ ہانڈیاں چاٹتے ہیں ان کی شادی پر بارش ہوتی ہے
یہ بات پورے پاکستان کے ہر علاقے کے لوگوں میں یکساں طور پر مشہور ہے کہ اگر دولہا یا دلہن میں سے کسی نے بھی شادی سے پہلے ہانڈی کو ختم ہونے کے بعد اپنے ہاتھ سے چاٹا ہو تو اس کی شادی والے دن لازمی طور پر بارش ہو گی
اگر کھانا کھاتے ہوۓ نوالہ گر جاۓ تو مہمان آتے ہیں
اکثر لوگ اس بات پر یقین رکھتے ہیں کہ اگر کھانا کھاتے ہوۓ منہ سے نوالہ گر جاۓ تو مہمان آتے ہیں۔
اگر جوتے کے اوپر جوتا آجاۓ تو بندہ سفر پر جاتا ہے
اگر جوتے اتارتے ہوۓ ایک جوتے کے اوپر دوسرا جوتا چڑھ جاۓ تو اس کا مطلب ہے کہ جوتے کا مالک عنقریب سفر پر جاۓ گا
اگر شلوار کا پائنجہ پلٹ جاۓ تو مسافر آتے ہیں
اگر شلوار کے ایک پیر یا دونوں پیروں کے پائنچے باہر کی طرف مڑے ہوں تو گھر میں دوسرے شہر سے مسافر مہمان کے طور پر آتے ہیں
اگر ہچکی لگے تو کوئی آپ کو یاد کر رہا ہے
اگر آپ کو ہچکی لگے تو کوئی آپ کو یاد کر رہا ہو گا اور آپ جیسے ہی اس کا نام پکاریں گے ہچکی غائب ہو جاۓ گی
اگر کسی کے اوپر پانی ڈالا جاۓ تو بارش ہوتی ہے
اگر بارش نہ ہو رہی ہو اور چانک کسی پر اس کی لاعلمی میں پانی ڈال دیا جاۓ اور وہ اس پر بہت چڑے تو اس کے نتیجے میں بارش ہوتی ہے